木筆體驗課程

分享:
  • 發佈於: 6 January 2016
  • by Kristin@Handsmore

台灣體驗第二課就係木工課喇!之前喺Niceday個網站度揀手作課程時,見到有木筆班,而製作過程只需兩個鐘,喺香港又好似未見過有得整,所以就揀咗呢個班喇! 不過上課地點就有少少難搵,因為附近都係一D住宅同埋菜市場,再加上佢又唔係地舖,所以更加難認。不過而家科技咁發達,有Google Map幫手其實都可以順利搵到上課地點。而去到個地址之後,就要打電話俾個老師,等佢落嚟接你上去。因為上課嘅地點,應該係佢嘅工作室+棲身之所。

而因為搵路遲咗少少,所以去到時其他3位同學都已經揀好做木筆要用嘅木條了。不過老師都有從頭再介紹一次我聽,仲好耐心咁解釋每種木材有乜唔同。不過要喺咁多條木入面揀一條,花多眼亂,真係好難揀下。

而最後我就揀咗呢條深啡色,中間有D好似被蝕咗嘅木頭。老師話嗰個瑕疵位如果就得好嘅話,做出來嘅木紋反而會更特別。所以我就信咗老師嘅說話,揀咗呢條其貌不揚嘅木頭喇。

喺揀木頭時,老師俾咗呢堆sample我哋參考返完成後嘅效果。

而揀好咗木條之後,就要開始開工lu。老師首先會幫你從你所選擇嘅木條之中切割出兩舊木塊俾你,之後喺舊木中間搵出中心位置,再喺個中心位度鑽個㝫。

鑽好咗個㝫,咁就可以穿落下面呢部機器度繼續之後嘅步驟:

喺部機器高速轉動下,我哋需要將個批放埋去慢慢雕琢出一個圓柱體,然後再修飾成我哋想要嘅形狀。不過呢個步驟要相當小心,如果唔小心大力咗割走咗一忽,咁就無得返轉頭了。而喺雕琢嘅同時,D木屑都會周圍飛,所以呢個過程係需要戴住眼罩進行。

而當大致成形之後,如果想加D橫紋,可以先用鉛筆畫好想喺邊度加紋,咁老師就會跟返你嘅刻度幫你刻上去。其實自己刻都得嘅,不過萬人失手嘅話,咁咪功虧一簣囉~ 所以呢D咁重要嘅步驟,我都係交俾老師代勞好了。而成形之後,老師就會俾唔同粗幼嘅沙紙俾我哋逐步磨到個筆身變得圓滑。

當一切都做好晒,老師就會幫我哋搽上一層蠟。一搽完即時靚晒,D木紋好明顯,仲好有光澤添~

而去到最後,就係要套返個金屬筆芯。個筆芯主要都要靠呢個工具壓落去。呢個步驟亦都要好小心,因為萬一用力過頭壓爆咗個筆桿,咁就真係前功盡費。

幾經辛苦,終於完成咗呢支木筆喇~ 其實我自己本身對木製筆無乜偏好,不過呢支做完出嚟又真係好靚、比我想像中靚好多。原本諗住貪玩去享受個製作過程,整完出嚟就送俾人,不過而家又唔捨得送lu ~~~  有乜型得過拎住支自製嘅木筆出嚟寫字, 仲要支筆係靚個喎~~~~

 

台灣體驗系列:http://www.handsmore.com/tags/台北2015

 

分享: