台灣手作體驗最終回:復古木製手作音響

分享:
  • 發佈於: 15 May 2016
  • by Kristin@Handsmore

台灣體驗之行都完咗成5個月,今日終於都的起心肝去寫埋成個旅程嘅壓軸課程 - 復古木製手作音響。會揀呢個課程,並唔係因為我對音響有興趣。只係喺我出發前喺Niceday個網站度不斷搵有乜課程可以報,而呢個課程係我咁耐以來未見過,覺得非常新鮮、有挑戰性。加上幻想出來嘅音響可以放喺快要開設嘅Studio(現已開設)入面,簡直就型到爆。所以雖然個課程係有啲貴,不過音響本來就係貴嘢來,覺得都值得去做,就報咗名lu。

上課地點係喺離台北市中心都有啲遠嘅內湖區,不過捷運都去得到嘅,所以唔成問題。上課時間就比較長,係早上9:30至晚上6點,中間係會包埋午餐。所以上課當日神咁早就要喺我所住宿嘅西門町度出發。到達港墘站後,就根據google map去找上課地點。附近一帶都係一啲矮房子為主,而上堂嘅地方就係其中一棟嘅地下,都唔算難找。

因為晨咁早就出發,所以去到上課地點時都未食早餐。不過導師太太好好人咁叫我趁同學仔未到齊,去附近間便利店買吃的,喺講理論部份時可以邊聽邊食。

整個課程主要由兩位男導師負責,一開始就係上呢個理論課。不過對我嚟講,我只係鍾意落手做,對背後啲電子理論其實我都無入到腦...... 

而作為一個女孩子,我嘅注意力反而落咗去佢哋極窩心嘅茶水供應。佢哋仲怕我哋上堂時啲木屑灰塵會整污濁啲茶水,用咗好得意嘅杯蓋將佢哋好好保護住。

而喺剛開始製作時,老闆兼導師Mac仲親自調配咖啡俾我哋品嘗,呢份熱情...... 我都好想喺香港可以遇到。

都係入返正題啦~  以下就係音響嘅材料。

如果有做過木工嘅都應該知道,啲木係要磨架啦~ 所以一開波,我哋就係砌好個盒型,跟住就要磨磨磨~ 

跟住仲有導師親自做嘅蠟,要搽返靚個木箱表面~

之後就要拆返開個木箱,塗好膠水再慢慢連入面嘅間隔都組合好。

呢個時候就會感覺到女人係比男人細心,因為我啲膠水吱得好好架,唔會吱得太多。但男同學就比較貪快,雖然吱膠水嘅部份快過我好多,不過一組合完就因為膠水多得濟,咇晒啲膠水出嚟。佢哋要不斷抹走多餘嘅膠水時,我就反超前lu, Yeah~~~

專門Design來施壓定位嘅工具:

仲有專門Design方便扭緊螺絲位嘅小工具。每件工具,都係佢哋自己設計,真係好勁好貼心。

而喺等膠水乾嘅同時,又已經去到中午食飯嘅時間lu。呢個課程係包埋午餐架~ 而且仲係導師太太買回來的地道便當,真係好有台灣風味。而最最最特別嘅,就係可以同所有導師同同學坐埋一齊有傾有講咁食飯,真係好似融入咗台灣人入面 (雖然我嘅普通話程度唔能夠完全聽得明晒佢哋所講嘅嘢...)。去咁多次台灣,真係第一次自己一個同一班台灣人咁接近咁食飯交流。

午飯過後又要開工。因為個手抽位係會用到皮革,所以個課程仲可以玩下皮革~

又係男女大不同嘅時間,原來男人縫線時係會拉斷咗條線架..... 所以我又可以快過佢哋完成lu, haha~

整好皮革部份,就要開始電子部份喇~

久違了的辣雞.... 實不相瞞,我讀U時係讀電子工程,所以對於辣雞其實我一啲都唔陌生。

雖然好耐無焊過嘢,不過都算焊得唔錯啦,試喇叭時可以1 take過有聲,搞掂~

焊好完啲線,就要組裝落個木箱度。

木箱入面仲會加入優質絲綿,令到音質更加好。

呢個時候就可以將木手抽組裝埋落個木箱蓋度。

整個木箱組合完之後,就要用膠水封箱,再夾好固定待乾。

唔好以為咁就做完喇,最痛苦其實係最後個步驟。

最後就係要每隻角揼釘了..... 對於女仔.... 最難應該就係呢個步驟......... 仲要一揼就揼成48口釘!中間因為有啲揼歪咗,又要拆出嚟再揼過,所以實際上係多過48口.... 呢個步驟我做得最慢.... 明明原本我快過啲男仔架~ 就係呢個步驟,搞到我包尾了~~~

努力咗成日,由天光做到天黑,做到七點幾左右終於都大功告成~ 真係好開心、好有滿足感。因為部音響我要拎返香港,導師們仲好熱心好落力好揼本咁幫我免費打包,你完全feel到佢哋係好用心咁幫你諗點樣可以protect得最好,唔係為咗應酬交功課。佢哋一啲都唔怕麻煩、唔吝嗇,打包過程仲要好開心添,令我相當之感動。不過為免日後有人以呢個做standard,要求佢哋同樣地打包,以致佢哋蝕本,所以我唔公開打包成點了。總知就好warm、好warm啦~~

我同作品嘅合照亦有貼上佢哋牆上,大家如果有機會過去,可以搵下我呀~~

多得佢哋用心包裝,部音響可以完完整整咁帶到返嚟香港~ 同埋部機唔止外型靚,音色仲好好添架~ 而家就放咗喺Handsmore集作室,大家上來時可以留意下呀~

如果香港都有呢類課程可以上就好喇~ 又可能有,係我未知啦! 如果係咁的話,大家記得話我知~~

因為Handsmore就係要發掘一啲大家睇唔到、但原來一直存在嘅手作俾大家知道嘛~~~~

 

台灣體驗系列:http://www.handsmore.com/tags/台北2015

 

分享: